भाषा : जीवनव्यवहार आणि संवादकौशल्ये

भाषा : जीवनव्यवहार आणि संवादकौशल्ये हे पुस्तक विद्यार्थ्यांना, शिक्षकांना तसेच भाषेच्या अभ्यासात रस असणाऱ्या वाचकांना उपयुक्त ठरेल. भाषा ही केवळ अभ्यासक्रमापुरती मर्यादित न राहता जीवनाच्या प्रत्येक क्षेत्रात संवाद साधण्यासाठी आवश्यक आहे. दैनंदिन जीवनातील संवाद अधिक प्रभावी, स्पष्ट आणि समंजस व्हावा, यासाठी भाषेचे स्वरूप, तिची निर्मिती, विविध रूपे, कार्ये आणि उपयोजन यांचे सुलभ विवेचन या पुस्तकात केले आहे.

मौखिक व लिखित भाषा, उच्चारण व लेखनाचे परस्परसंबंध, श्रवण व संभाषणाचे महत्त्व, तसेच संवादकौशल्ये—श्रवण, भाषण, संभाषण, निवेदन, लेखन, सारांशलेखन, भाषांतर, मुलाखत आणि कल्पनाविस्तार—यांचा विस्ताराने आढावा घेतला आहे. ही कौशल्ये आत्मसात केल्याने विद्यार्थ्यांचा आत्मविश्वास वाढतो, व्यक्तिमत्त्व विकास साधतो आणि ज्ञान प्रभावीपणे मांडता येते.

पुस्तकात शैक्षणिक अभ्यासक्रमाशी सुसंगत तसेच प्रत्यक्ष जीवनात उपयोगी पडणारी माहिती दिली आहे. डिजिटल युगातील संकेतस्थळे, ब्लॉग्स आणि शैक्षणिक लेखसंग्रहांचा आधार घेतलेला असल्यामुळे हे लेखन कालानुरूप आणि विद्यार्थ्यांच्या गरजांशी सुसंगत आहे.

हे पुस्तक भाषेचे शास्त्र, तिचे व्यवहारातील स्थान आणि संवादकौशल्यांचा व्यावहारिक उपयोग समजून घेण्यासाठी मार्गदर्शक ठरेल. विद्यार्थ्यांना उत्तम संवाद साधण्यासाठी आणि जीवनात यशस्वी होण्यासाठी ही कौशल्ये निश्चितच उपयुक्त ठरतील.

राष्ट्रीय शैक्षणिक धोरण (NEP 2020) च्या मार्गदर्शक तत्त्वांनुसार, सावित्रीबाई फुले पुणे विद्यापीठ ‌‘द्वितीय वर्ष - मराठी (AEC)‌’ विषयाच्या नवीन NEP अभ्यासक्रमावर आधारित